O PRATO HARVARD

Este curso 2025/2026, no ámbito Natural e Social, traballamos o Prato de Harvard como unha proposta vivencial e significativa para achegar ao alumnado á alimentación saudable desde unha linguaxe próxima e motivadora.

A partir desta ferramenta visual, o alumnado foi descubrindo como debe organizarse un prato equilibrado, identificando os distintos grupos de alimentos e comprendendo a súa importancia no coidado do corpo. Para favorecer a comprensión e a motivación, introducimos a figura dos “superheroes dos grupos de alimentos”, convertendo cada grupo nun aliado con “poderes” diferentes que axudan a medrar, ter enerxía, protexer o corpo e manterse saudable.

Deste xeito, as froitas e verduras convertéronse en superheroes protectores, os cereais en fontes de enerxía, as proteínas en construtores do corpo e a auga no elemento esencial que mantén todo en equilibrio. Esta narrativa permitiu que o alumnado se implicase de forma máis activa, facendo máis accesible a aprendizaxe e facilitando a identificación de cada grupo de alimentos.

As actividades desenvolvéronse de maneira manipulativa e lúdica, a través de xogos de clasificación, creación de pratos saudables, dinámicas de asociación e propostas de exploración adaptadas á súa idade. O alumnado participou de forma activa, tomando decisións, compartindo ideas e construíndo pouco a pouco hábitos saudables desde a experiencia.

Todo isto integrouse nunha metodoloxía global baseada na aprendizaxe activa, o xogo, a experimentación e o traballo cooperativo, con propostas en gran grupo, pequenos grupos e tamén individuais. Mantívose así unha liña coherente co resto das situacións de aprendizaxe do ámbito.

O traballo co Prato de Harvard e os seus superheroes permitiu que o alumnado se achegase á alimentación saudable dun xeito significativo, comprendendo que coidar o que comemos é tamén unha forma de coidar o noso corpo e o noso benestar diario.

Deixámosvos un recompilatorio do noso traballo a modo de vídeos:

Vémonos o curso que ven!

:)